Administrata e presidentit Donald Trump po i bën presion Serbisë dhe vendeve të tjera të Ballkanit që të pranojnë emigrantë të dëbuar nga Shtetet e Bashkuara, raportoi të enjten Bloomberg News.
Këto kërkesa ndaj vendeve të rajonit janë pjesë e një strategjie më të gjerë të SHBA-së për të gjetur qeveri të huaja që janë të gatshme të pranojnë emigrantët e dëbuar, sipas burimeve të cituara nga Bloomberg.
Shtëpia e Bardhë, Departamenti Amerikan i Shtetit dhe Ministria e Jashtme e Serbisë nuk kanë komentuar menjëherë për këtë çështje.
Muajin e kaluar, Gjykata e Lartë e SHBA-së lejoi administratën Trump të revokojë statusin e përkohshëm ligjor për qindra mijëra emigrantë nga Venezuela, Kuba, Haiti dhe Nikaragua që jetonin në SHBA, duke forcuar përpjekjet e presidentit republikan për të rritur dëbimet.
Administrata Trump është duke kërkuar destinacione të mundshme për këta emigrantë që mund të përballen me dëbim pas vendimit të gjykatës.
