Vetëm pak ditë pas largimit të tij nga administrata amerikane, miliarderi dhe sipërmarrësi Elon Musk ka reaguar me tone të ashpra kundër projektligjit të ri të Presidentit Donald Trump, që parashikon lehtësime të ndjeshme tatimore dhe shkurtime të mëdha në shpenzimet publike.
Përmes një postimi në rrjetin social X (ish-Twitter), Musk nuk i kurseu kritikat ndaj Kongresit dhe mbështetësve të ligjit, duke shkruar:
“Më vjen keq, por nuk mund të duroj më. Ky projektligj skandaloz dhe me shpenzime të panevojshme të Kongresit, është një neveri e turpshme. Turp për ata që e votuan. Ju e dini që vepruat gabim.”
Projektligji, i cili kaloi në Dhomën e Përfaqësuesve muajin e kaluar me një shumicë të ngushtë, është përballur me kundërshtime të forta edhe nga ekspertë të fushës ekonomike. Zyra e Pavarur e Buxhetit të Kongresit ka paralajmëruar se iniciativa do t’i shtojë mbi 3.8 trilionë dollarë borxhit federal, i cili aktualisht ka arritur shifrën alarmante prej 36.2 trilionë dollarësh.
Musk ndau të njëjtin shqetësim, duke shtuar:
“Ky projektligj do ta rrisë në mënyrë të konsiderueshme deficitin buxhetor dhe do të rëndojë qytetarët amerikanë me një borxh të papërballueshëm.”
Reagimi i fortë i Musk vjen pak ditë pas dorëheqjes së tij nga një rol strategjik në administratën e Trump. Ai ishte emëruar nga presidenti për të udhëhequr një departament të posaçëm, me mision të ulte shpenzimet dhe të riste efikasitetin në strukturat federale. Megjithëse ndërhyri në disa agjenci dhe nisi disa reforma, sipas burimeve nga Shtëpia e Bardhë, Musk nuk arriti të përmbushte pritshmëritë dhe zgjodhi të largohej.
Zëdhënësi i Shtëpisë së Bardhë, në një deklaratë për mediat, theksoi se:
“Presidenti Trump është në dijeni të qëndrimit të z. Musk. E respekton mendimin e tij, por puna për të finalizuar projektligjin do të vazhdojë.”
Aktualisht, projektligji ndodhet në duart e Senatit amerikan, ku republikanët e afërt me Trump mbajnë shumicën. Sipas vlerësimeve të analistëve politikë në Uashington, projektligji pritet të votohet brenda muajit të ardhshëm. Megjithatë, nuk përjashtohet mundësia që versioni final të pësojë disa ndryshime, për të adresuar shqetësimet që kanë dalë në pah nga publiku dhe nga vetë pjesëtarë të Partisë Republikane.
Kujtojmë se Elon Musk është një nga zërat më të fuqishëm në fushën e teknologjisë dhe sipërmarrjes në SHBA, dhe komentet e tij shpesh ndikojnë jo vetëm në opinionin publik, por edhe në dinamikat politike e ekonomike të vendit. Kjo përplasje me ish-presidentin Trump pritet të ketë jehonë të gjerë në ditët në vijim.
