Qendrat për shpërndarjen e ndihmës në Gazë do të mbyllen përkohësisht më 4 qershor, njoftoi fondacioni që i menaxhon ato, ndërsa ushtria izraelite paralajmëroi se rrugët që çojnë drejt qendrave “konsiderohen zona të luftës”.
Njëzet e shtatë persona u vranë në jug të Gazës të martën, kur ushtria izraelite hapi zjarr pranë një qendre të ndihmës të drejtuar nga Fondacioni Humanitar për Gazën (GHF), i mbështetur nga Shtetet e Bashkuara.
Së fundmi, Izraeli ka lehtësuar bllokadën në enklavën palestineze, por Kombet e Bashkuara kanë paralajmëruar se e gjithë popullsia e territorit është në rrezik nga zia e bukës.
Të mërkurën, Këshilli i Sigurimit i OKB-së pritet të votojë një rezolutë që bën thirrje për armëpushim dhe qasje humanitare në Gazë – një masë për të cilën SHBA-ja pritet të vendosë veto.
GHF-ja tha se “qendrat e shpërndarjes do të mbyllen për rinovim, riorganizim dhe përmirësim të efikasitetit të punës” të mërkurën dhe operacionet do të rinisin të enjten.
Ushtria izraelite, që ka konfirmuar mbylljen e përkohshme, paralajmëroi njerëzit të mos kalojnë “në rrugët që çojnë drejt qendrave të shpërndarjes, të cilat konsiderohen zona të luftës.”
GHF-ja nisi operacionet një javë më parë, por OKB-ja dhe grupet e tjera të mëdha të ndihmës kanë refuzuar të bashkëpunojnë me të, duke ngritur shqetësime se kjo organizatë është krijuar për t’u përshtatur me qëllimet ushtarake të Izraelit.
Pas incidentit vdekjeprurës të së martës afër një qendre të GHF-së, Sekretari i Përgjithshëm i OKB-së, Antonio Guterres, e cilësoi “të papranueshme” vrasjen e palestinezëve që po shkonin për të marrë bukë në qendrat e shpërndarjes.
Autoritetet izraelite dhe GHF-ja – që përdor personel amerikan të sigurisë – kanë mohuar akuzat se ushtria izraelite qëllon civilët që shkojnë për të marrë ndihma. Ushtria izraelite tha se ngjarja e së martës është duke u hetuar.
Izraeli ka intensifikuar përpjekjet për të mposhtur Hamasin – grupin palestinez të shpallur organizatë terroriste nga SHBA-ja dhe Bashkimi Evropian – i cili sulmoi Izraelin në tetor 2023, duke nxitur luftën në Gazë.
Ministria e Shëndetësisë në Gazën e udhëhequr nga Hamasi ka bërë të ditur se të paktën 4.240 persona janë vrarë që kur Izraeli ka rinisur ofensivën në territorin palestinez më 18 mars, ndërsa numri i përgjithshëm i viktimave që nga nisja e luftës ka arritur mbi 54.000.
Ndërkohë, gjatë sulmit të Hamasit në jug të Izraelit u vranë afër 1.200 persona dhe u rrëmbyen rreth 250 të tjerë.
Përveç incidentit në qendrën e ndihmës, agjencia për mbrojtje civile në Gazë të martën raportoi edhe për 19 të vrarë.
Ndërsa ushtria izraelite njoftoi se tre ushtarë të saj janë vrarë në veri të Gazës, duke e çuar numrin e përgjithshëm të ushtarëve izraelitë të vrarë që nga nisja e luftës në 424./rel
