Ish-kryeministri Sali Berisha deklaroi sot se Partia Socialiste ndodhet në kaos dhe panik pas mesazheve të fundit nga Kongresi i SHBA, të cilat, sipas tij, konfirmojnë korrupsionin qeveritar në Shqipëri.
Gjatë një deklarate për mediat, Berisha theksoi se fondet e USAID janë shpërdoruar nga anëtarë të elitës qeveritare dhe shtoi se kryeministri Edi Rama mund të thirret për hetime në çdo moment.
“Mesazhe të kristalta erdhën nga Kongresi i SHBA. Shqipëria, korrupsion, korrupsion dhe vetëm korrupsion qeveritar. Paratë e taksapaguesve amerikanë janë shpërdoruar nga gratë dhe lidhjet e tjera familjare të elitës së korruptuar të ekstremit të majtë shqiptar,” tha ai.
Berisha deklaroi gjithashtu se shpallja e kartelit të Sinaloas si organizatë terroriste nga ish-presidenti Donald Trump ka qenë një tjetër goditje për Ramën, të cilin e akuzoi si bashkëpunëtor të këtyre organizatave.
“Prokurorët amerikanë do të vijnë në Tiranë dhe nuk mund t’i kontrollojë Rama. E vërteta është që nga dita në ditë, ai mund të thirret për krimet që ka kryer,” shtoi ai.
Berisha përmendi edhe një denoncim të tij të bërë në vitin 2021, ku pretendon se kishte paralajmëruar për një marrëveshje korruptive të qeverisë, të cilën, sipas tij, e ka denoncuar edhe Kongresi Amerikan.
