Kryeministri Rama ka vijuar edhe sot me rubrikën “Sy m’Sy” në rrjetet sociale, ku ka replikuar me një komentues që ngrinte shqetësimin për korrupsionin në sistemin shëndetësor.
Rama theksoi se që nga marrja e detyrës nga PS, janë ndërtuar 53 spitale të reja, duke përfshirë 10 që nuk ekzistonin më parë dhe 43 të rindërtuara nga e para.
“Sot kemi 400 qendra shëndetësore të ndërtuara nga e para, që iu shërbejnë 1.6 milionë qytetarëve. Kemi mjekë të mirëpaguar, 140% më shumë se më parë, infermierët me 112% rritje page. Paguajmë 120 milionë euro për rimbursimin e barnave”, u shpreh Rama.
Ai gjithashtu njoftoi ndërtimin e dy spitaleve ultra modernë në mandatin e katërt, në bashkëpunim me Emiratet e Bashkuara dhe me strukturën më të mirë spitalore të Italisë. “Nuk do të çojmë askënd jashtë për asnjë operacion të komplikuar, të vijnë këtu të kurohen edhe shqiptarët që janë jashtë. Më e mira është përpara”, deklaroi Rama.
