Komisioni i Kërkesave pranë Komisionit Qendror Zgjedhor ka marrë një vendim përfundimtar lidhur me aktivitetin që u zhvillua më 20 shkurt në sheshin "Skëndërbej", pas kërkesës nga Bashkia e Tiranës për të mbledhur të gjithë punonjësit e saj në prani të kryeministrit Edi Rama.
KQZ e ka mbështetur Qëndresën Qytetare, duke rrëzuar kërkesën e Bashkisë Tiranë dhe Edi Ramës. Komisioni e arsyetoi këtë vendim duke theksuar se grumbullimi i 20 shkurtit ishte i ndryshëm nga ai që ishte kërkuar nga institucionet.
Fillimisht, Bashkia Tiranë kishte kërkuar leje nga KQZ për zhvillimin e një aktiviteti për promovimin e turizmit, ku do të ishin të pranishëm edhe ambasadorët. Megjithatë, gjatë zhvillimit të aktivitetit, u vërejt se tematika që u trajtua nuk kishte të bënte fare me turizmin.
Ky aktivitet u denoncua nga Qëndresa Qytetare për shkelje të rregullave pranë KQZ. Pas një seance përballuese me përfaqësues të Kryeministrisë dhe anëtarët e Komisionit të Ankesave, u vërtetua se në të vërtetë ishin zhvilluar dy aktivitete të ndryshme, një i lajmëruar nga Bashkia dhe Kryeministria dhe një tjetër, i dokumentuar në media, që nuk kishte të bënte me turizmin.
Pas shqyrtimit, KQZ kërkoi që të mbetej në fuqi miratimi i aktivitetit të lajmëruar, ndërsa Qëndresa Qytetare kërkoi anulimin e tij. Pas një shqyrtimi të mëtejshëm, Komisioni i Ankesave vendosi të rrëzojë aktivitetin e 20 shkurtit, të organizuar nga Bashkia e Tiranës dhe Kryeministria.
