Kryetari i grupit parlamentar të PD ka përshëndetur sot punën e prokurorëve të SPAK, duke u kërkuar atyre të hetojnë Belinda Ballukun. Në një konferencë të paralajmëruar, Gazment Bardhi ka renditur akuza lidhur me sektorin e energjetikës, të cilat nuk janë as të reja dhe as të padëgjuara më parë.
Ndryshimi qëndron në faktin që zoti Bardhi ka dorëzuar këtë herë një dosje që e ka matur me kilogramë dhe që shpreson të merret në konsideratë nga prokurorët e posaçëm.
Akuzat e zotit Bardhi ndaj numrit dy të qeverisë vijnë në një kohë kur të dy përballen politikisht në qarkun e Fierit. Beteja për 11 majin duket se ka vënë në lëvizje edhe kryetarin e grupit parlamentar të PD, i cili me gjasë po e sheh këtë sulm si një formë për të fituar terren në një kohë kur Fieri nuk ka qenë asnjëherë një pikë e fortë për demokratët.
