Kryetari i Partisë Demokratike, Sali Berisha, reagoi ndaj thirrjeve të protestuesve që një ditë më parë u mblodhën para selisë së PD-së, ku u hodhën akuza ndaj opozitës dhe u dëgjuan slogane që e cilësonin atë të shitur.
I pyetur nga gazetarët, Berisha tha se çdo protestues ka të drejtë të shprehë mendimin e tij, por bëri dallimin mes qytetarëve të lirë dhe atyre që i quajti “opozita e opozitës”.
“Çdo protestues ka të drejtë të thotë ç’të dojë dhe askush nuk i ndërhyn. Nga protestuesi, qytetari i lirë dhe opozitarët e opozitës, këta të fundit janë shpërbetarë të qeverisë. Pra çdo qytetari i lirë në opozitë mund të thotë ç’të dojë, kurse tipat e stisur si opozitë e opozitës ata janë mjerim i politikës”, deklaroi Berisha.
Kreu i PD-së u ndal edhe te protestat kundër projektit në Zvërnec, duke theksuar se Partia Demokratike mbështet çdo reagim qytetar, por nuk synon të marrë drejtimin apo autorësinë e tyre.
“Nuk jemi ata ne që t’i marrim protestën tjetrit, atë nuk e bëjmë kurrë. Ka një moral. Mbështesim çdo protestë të çdo qytetari, por ne autorësi nuk i marrim kurrë. Nëse ai bën antimiting atje, atëherë do të përballet me ne”, u shpreh Berisha.
