Debati për projektet turistike në Nartë dhe Zvërnec ka rikthyer në vëmendje ndryshimet e miratuara në ligjin për zonat e mbrojtura, të cilat sipas ambientalistëve dhe kundërshtarëve të këtyre projekteve i hapën rrugë ndërtimeve brenda disa prej zonave më të rëndësishme natyrore të vendit.
Amendamentet u propozuan në Kuvend nga një grup deputetësh të Partisë Socialiste dhe u mbështetën publikisht nga ministrja e Turizmit dhe Mjedisit, Mirela Kumbaro.
Deputetët propozues ishin:
* Fadil Nasufi – qarku Berat
* Florenc Spaho – qarku Elbasan
* Arkend Balla – qarku Durrës
* Edona Bilali – qarku Shkodër
* Bujar Çela – qarku Fier (Lushnje)
* Anduel Tahiraj – qarku Vlorë
* Shpresa Marnoj – qarku Lezhë
* Mirela Pitushi – qarku Fier
* Denis Deliu – qarku Durrës
* Klodiana Spahiu – qarku Durrës
* Enslemvera Zake – qarku Korçë
* Eduart Ndreca – qarku Lezhë
Sipas kundërshtarëve të ndryshimeve ligjore, amendamentet prekën ose krijuan mundësi zhvillimi për projekte turistike në disa prej zonave më të ndjeshme të vendit, mes tyre:
* Parku Kombëtar i Butrintit, pasuri botërore e UNESCO-s
* Kanioni i Langaricës, monument natyre
* Syri i Kaltër, monument natyre
* Peizazhi i mbrojtur Bunë-Velipojë, përfshirë zonën e Rrjollit
* Rrana e Hedhur, monument natyror
* Pisha e Poros dhe Narta, monument natyror
* Zvërneci, përfshirë Lagunën e Limopuas dhe kodrat flishore
* Laguna e Orikumit
* Zona e Tales
* Projekti “Pikëza e Vogël” në Butrint
* Projekti i Aramerasit dhe reduktimi i sipërfaqes së mbrojtur në Butrint
* Dy projekte të investitorëve strategjikë në Palasë, në Alinuara dhe Kalivo, brenda zonave të mbrojtura dhe në afërsi të pasurive të UNESCO-s.
Ndërsa debati për Nartën dhe Zvërnecin është përshkallëzuar në protesta masive, ambientalistët po rikthejnë në vëmendje emrat e deputetëve që propozuan këto ndryshime, duke argumentuar se vendimet e marra në Kuvend vite më parë po prodhojnë sot konfliktet më të mëdha mes zhvillimit turistik dhe mbrojtjes së natyrës.
