Kryeministri Rama ka reaguar ndaj protestës së zhvilluar kundër ndërtimeve në Zvërnec, duke i cilësuar pjesëmarrësit si “mysafirë të paftuar”.
Në një postim në rrjetet sociale, Rama e ka krahasuar retorikën e protestuesve me ekstremizmin e së kaluarës në Gjermaninë naziste, si dhe me veprimet e së djathtës ekstreme greke Agimit të Artë, duke i lidhur me gjuhë urrejtjeje dhe thirrje radikale. Ai ka kritikuar gjithashtu thirrjet kundër investimeve dhe ka paralajmëruar për rrezikun e nxitjes së dhunës në diskursin publik.
Postimi
MYSAFIRËT E PAFTUAR TË NATËS NË SELINË E PARTISË SOCIALISTE
“Shqipëria e shqiptarëve” dhe këto çeta kinse shqiponjash që ulërasin kësisoj rrugëve, të kujtojnë “Gjermaninë e gjermanëve” me ata ulëritësat e verbër si këta mysafirët e natës tek selia e PS, që e kthyen Gjermaninë në thertoren e hebrenjve dhe e katandisën në delen e zezë të planetit?
Po meqë Gjermania naziste është larg dhe zëre se i kam përpara syve urrejtjenxitësit e këtyre të rinjve pa busull duke u thënë, “ju s’jeni nazistë ju jeni patriotë, prandaj jepini fort gojës së shthurrur se do ta djegim Shqipërinë e tradhëtarëve”, po shtoj që kjo “Shqipëria e shqiptarëve” është tëpkë si “Greqia e grekëve”, ajo e atyre çakejve të Agimit të Artë që donin t’i digjnin të gjallë “tradhëtarët” e Greqisë bashkë me shqiptarët, të cilët sipas tyre po merrnin punët e paratë e popullit grek?
Çuditërisht edhe ata ishin kundër investimeve e resorteve cilësore, me të vetmin ndryshim se këta “shqiptarët tanë të vërtetë” nuk kishin gisht në kuturisjen e atyre, kurse ata kanë gishtin e tyre në kuturisjen e këtyre?
Fali Zot se s’dinë se ç’bëjnë thuhet në këto raste
