Në prag të protestës së katërt kundër projektit në Nartë dhe Zvërnec, Edi Rama ka publikuar dy projekte të realizuara nga investitorët nga Katari, duke i paraqitur si shembuj të zhvillimit në harmoni me natyrën. Kryeministri mbrojti publikisht vëllezërit Al-Khayyat, duke i cilësuar blerës legjitimë të truallit privat në Zvërnec dhe pjesë të një prej grupeve më të mëdha sipërmarrëse në Lindjen e Mesme.
Në reagimin e tij, Rama nuk kurseu as kritikat ndaj kundërshtarëve të projektit, për të cilët tha se mes tyre ka “armiq të Shqipërisë Europiane”, “konkurrentë të Shqipërisë Turistike” dhe “shqiptarë të verbër që po përdoren si vegla qorre”. Në fund, ai krahasoi kundërshtimet ndaj projektit me debatet e dikurshme për stadiumin kombëtar, duke lënë të kuptohet se edhe këtë herë rezultati do t’u japë të drejtë mbështetësve të zhvillimit.
Postimi vjen ndërsa protestat kundër projektit po vijojnë dhe organizatorët kanë paralajmëruar një tjetër tubim në Tiranë.
