Sali Berisha ka paralajmëruar sot se Rama dhe Balluku po përpiqen të vjedhin zgjedhjet, por demokratët nuk do ta lejojnë këtë. Madje -sipas tij- mund t’i rikthehen sërish mosbindjes civile. Në një konferencë për shtyp, Sali Berisha tha se Balluku në Fier përdor metodat e një terrorizmi të vërtetë elektoral. Të njëjtën gjë bëjnë kudo, kryetarët e bashkive kanë braktisur detyrat.
Lidhur me votën e diasporës, Berisha nënvizoi se kryetarët e bashkive janë në krye të manipulimit të votës. “Ata rrinë nëpër botë nëpër fushatë elektorale. Përgëzoj emigracionin që po i refuzon, as sa nuk janë në gjendje të filmojnë takimet e tyre sepse janë të dështuar në të gjitha. Kryetarët e bashkive nga Saranda gjer në Kukës janë shpërndarë si terroristë elektoralë”.
Njëkohësisht, Sali Berisha paralajmëroi Sorosin të mbyllë zyrat, sepse pas 11 majit nuk do të ketë më vend për fondacionin e tij në Shqipëri. “Unë i bëra thirrje Aleksis Soros të mbyllë fondacionin në Shqipëri, sepse i jap fjalën që javën e parë pas 11 majit do të mbyllet me dekret ligj që të mos shkelë më në Shqipëri,” tha sot kryetari i PD në vigjilje të mbledhjes së grupit parlamentar të kësaj partie.
