Sali Berisha ka ftuar Edi Ramën në ringun e debatit politik. Duke përdorur akuzat e Gazment Bardhit ndaj Olsi Ramës, kryetari demokrat ka ripërsëritur edhe një herë përgjegjësinë që ka kryeministri për përfshirjen e të vëllait me bandat kriminale. Për këtë, ai paraqiti hyrje-daljet e Olsi Ramës në kufi në një tabelë me regjistrimet e sistemit TIMS.
Një ditë më parë, Edi Rama iu përgjigj Gaz Bardhit për të njëjtat akuza që përsëritj sot Berisha. Ndoshta kjo përgjigje më shumë se përmbajtja nuk i ka vajtur pas oreksit politik Sali Berishës. Që vështirë ta pranojë se Edi Rama ka caktuar homolog të vetin në PD Gazment Bardhin. Prej disa javësh në fushën e betejës politike, Sali Berisha ka tashmë ka përballë Belinda Ballukun. Numri dy i qeverisë Rama i përgjigjet dhe akuzon, sipas rastit, kryetarin e PD-së. Ndërsa kryeministri preferon që debatin publik në Kuvend ose në distancë ta zhvillojë me Gazment Bardhin, numrin 2 të PD-së. Kjo strategji e Ramës, me gjasë, e ka nervozuar Sali Berishën, i cili dje “detyroi” Gaz Bardhin ta lërë pa përgjigje Edi Ramën. Një arsye më shumë për të mërzitur kreun e deputetëve demokratë, duke pasur parasysh dëshirën e tij për protagonizëm politik përballë Edi Ramës.
Jo më kot Sali Berisha ricikloi sot akuzat për Olsi Ramën, që për hir të së vërtetës kanë qenë në “pronësi” të Gaz Bardhit. Ky riciklim, në një ditë me lajme interesante nga SPAK, në rastin më të mirë është një çark që Berisha ngre për të përfshirë në debatin politik direkt me të Edi Ramën. Ndërsa në rastin më të keq, do të jetë një shashkë e një strategjie të mirëmenduar nga kryeministri për ta lënë jashtë vëmendjes politike kryetarin e PD-së.
