Më pak se 80 ditë para zgjedhjeve parlamentare, ethet e fushatës kanë nisur të ndihen në kampet e dy partive të mëdha. Por, nëse disa kanë vendosur të zhvillojnë takime, të takohen me njerëzit dhe të zgjedhin alternativën e duhur, drejtuesi politik i PD-së për Tiranën ka zgjedhur të merret me ndryshimet në administratën e re të SHBA.
Po të shohësh postimet e Belind Këlliçit, përveç ndarjes së postimeve të takimeve të Sali Berishës, bie në sy se drejtuesi politik i Tiranës shpreson se fitorja e demokratëve vjen nga Amerika, sidomos nga emërimet e administratës së re. Thuajse asnjë takim me strukturat, asnjë program i prezantuar, asnjë takim me qytetarët e paangazhuar politikisht, ama kur vjen fjala tek emërimet në FBI, zoti Këlliçi është i pari që ndan postimet në profilin e tij në Facebook.
A thua ndikon kjo në rezultatet e pritshme të demokratëve më 11 maj? Çfarë roli mund të ketë zëvendësshefi i FBI me Kamzën, Ndroqin, Kavajën apo edhe Tiranën? Këtë më mirë e dinë drejtuesit politikë të demokratëve në kryeqytet, të cilët mesa duket ia kanë lënë në dorë “fitoren” Departamentit të Shtetit dhe FBI-së… Ndoshta ata dinë diçka që ne nuk e dimë.
