Në disa kryqëzime kryesore të Tiranës, semaforët për këmbësorët janë modifikuar nga Bashkia Tiranë duke u shfaqur me simbolin e "Shqiponjës". Semaforët vazhdojnë të tregojnë ngjyrën jeshile dhe numërimin për kalimin e këmbësorëve, por në vend të simbolit standard, është vendosur një tjetër simbol.
Që nga dje, Drejtoria e Përgjithshme e Mirëmbajtjes së Rrugëve dhe Ndriçimit Sinjalistik në Bashkinë Tiranë ka kryer këto ndërhyrje pa konsultuar Kodin Rrugor. Sipas legjislacionit në fuqi, sinjalistika rrugore, si horizontale ashtu edhe vertikale, është e qartë dhe e përcaktuar. Konkretisht, neni 41 i Kodit Rrugor, "Sinjale të ndritshme", përcakton formën dhe ngjyrën e sinjaleve. Neni 41, pika 5 thekson se "Vendkalimet e semaforizuara të këmbësorëve mund të jenë të pajisura me sinjal zanor për të verbërit. Dritat e semaforëve për këmbësorët duhet të kenë formën e një këmbësori me ngjyrë mbi sfond të zi". Ngjyrat standarde janë e kuqe, e verdhë dhe e gjelbër. E njëjta gjë vlen edhe për sinjalistikën e vijave të bardha, të cilat në disa rrugë të Tiranës janë shndërruar në të kuqe.
Kjo është një shkelje e pakuptimtë, sidomos duke pasur parasysh që simbolet kombëtare në sinjalistikën rrugore nuk kanë ndonjë vlerë kaq të madhe, dhe aq më tepër, nuk lidhen me ndonjë zhvillim historik apo përkujtim të ndonjë eventi të veçantë.
Këto veprime të Kryetarit të Bashkisë duken si një përpjekje për të shpërqendruar vëmendjen, në një kohë kur skandalet e institucionit që ai drejton kanë mbizotëruar mbi propagandën, e cila tashmë ka marrë përmasa qesharake.
