Fotoja që shihni është bërë në mes të ditës, rreth orës 12:30 në një nga rrugët kryesore të Tiranës. Siç shihet edhe nga fotoja, makina e shërbimit të mbledhjes së mbeturinave në qytet "Eco Tirana" mbledh mbeturinat në mes të ditës.
Punonjësit në mes të shiut që nxitojnë të shkarkojnë mbeturinat në makinë, për të vendosur me vrap koshat në vendin e tyre. Kjo procedurë do ishte normale nëse do kryhej në mëngjes herët apo në darkë vonë, por kurrsesi në mes të ditës.
Në një qytet ku rrugët kryesore janë të mbingarkuar nga makinat, bëhet e rrezikshme bllokimi i qarkullimit aq më tepër në të njëjtën rrugë duhet të kalojnë Urgjenca Mjekësore apo qoftë edhe mjetet e shërbimit urban.
Ky fenomen nuk është rast i izoluar, pasi në disa rrugët të Tiranës mbetjet hiqen gjatë ditës.
Përmes kësaj fotoje dhe shkrimi, kurrsesi nuk kërkon të denoncojë, punonjësit heronj, që bëjnë punën në kushte tejet të vështira, por i kujton Bashkisë Tiranë që ka parashikuar të shpenzojë 2.9 miliardë lekë (29 milionë euro) për menaxhimin e mbetjeve urbane në 2024, 47% më e lartë se viti 2020, të bëjë punën sipas parashikimeve ligjore.
Dhe qytetarëve të mos harrojnë që në fillim të shtatorit, teksa Tirana ishte pushtuar nga malet me plehra, kryebashkiaku Veliaj deklaroi se pastrimi ishte sabotuar.
Asokohe ai akuzoi kompanitë private që ishin kontraktuar nga bashkia se lanë pa pastruar qytetin dhe njoftoi centralizimin e këtij shërbimi në dorën e bashkisë.
“Nga sot, pastrimi do të kryhet nga Bashkia e Tiranës, nëpërmjet Eco Tiranës. Tranzicioni nga privati te bashkia i këtyre zonave u sabotua me mbështetje nga politika e pisllëkut dhe zhulit”, – shkruante Veliaj në një postim në rrjetet sociale.
