Policia e Shkodrës dyshon se në makinën ku udhëtonin Hamza Lici dhe Arlind Bushati, të cilët u ekzekutuan pasditen e djeshme në Dobraç, mund të ketë qenë edhe një person i tretë. Ky person ka arritur t’i mbijetojë atentatit të mirorganizuar. Deri në këto momente, i mbijetuari nuk është identifikuar ende. Hamza Lici, vëllai i të shumëkërkuarit Ibrahim Lici, dhe Arlind Bushati, djali i Xhemal Bushatit — kandidatit të PD-së për kryetar bashkie në zgjedhjet e pjesshme vendore në Shkodër më 2022 — u qëlluan ndërsa ndodheshin në të njëjtin automjet. Lici ndërroi jetë menjëherë, ndërsa Bushati më vonë në spital. Viktimë mbeti edhe Flutura Basha, e cila po udhëtonte me motor së bashku me bashkëshortin, Bashkimin, i cili ndodhet në gjendje të rëndë. Policia dyshon se motivi i krimit lidhet me përplasjet mes grupeve kriminale Bajri dhe Lici.
