Policia greke ka arrestuar autorin e dyshuar të vrasjes së 41-vjeçarit shqiptar, Altin Arapaj, ngjarje që tronditi opinionin publik në zonën e Rafinës.
Në pranga ka rënë një tjetër shtetas shqiptar, 49-vjeçari Mikel Selimaj, i cili u gjet i fshehur në një shtëpi në Glyka Nera, ku u organizua një operacion i befasishëm nga autoritetet helene.
Sipas informacioneve të siguruara nga protothema.gr, ngjarja ndodhi të mërkurën në mëngjes (pardje), kur bashkëshortja e viktimës njoftoi policinë, duke deklaruar se Arapaj e kishte telefonuar pak para se të ndërronte jetë. Ai i kishte thënë se ishte qëlluar në fytyrë nga një person specifik – identitetin e të cilit ajo e përmendi para hetuesve – dhe i kërkoi të përpiqej ta gjente.
Hetimet zbuluan se vrasja kishte ndodhur mbrëmjen e të martës, kur viktima, autori i dyshuar dhe dy persona të tjerë u takuan në zonën e Artemidës. Ata hipën në një makinë të drejtuar nga Selimaj dhe ndaluan për pak minuta në kryqëzimin e rrugëve Pefkon dhe Arionos në Rafinë. Pikërisht aty, autori nxori armën dhe e qëlloi Arapajn në fytyrë.
Pavarësisht plagës së rëndë, 41-vjeçari arriti të largohej për pak minuta nga vendi i ngjarjes në këmbë dhe të telefononte gruan, por humbi jetën pak çaste më vonë. Selimaj u largua me makinë, e cila më pas u lokalizua nga policia, brenda së cilës u gjetën gjurmë gjaku dhe një gëzhojë.
Të dy personat, si viktima ashtu edhe autori i dyshuar, rezultojnë të kenë qenë më parë të përfshirë në çështje të lidhura me trafikun e drogës.
Policia greke po vijon hetimet për të zbardhur të plotë rrethanat e këtij krimi të rëndë dhe për të kuptuar nëse ka persona të tjerë të përfshirë.
