Zbardhen detaje të reja nga operacioni i zhvilluar një ditë më parë nga SPAK dhe anti-mafia e Barit ku u lëshuan 52 urdhër-arreste. Adi Çoba pronar i kompanisë Felix Vinum, një prej 52 të dyshuarve si pjesë e grupit kriminal që u godit nga SPAK dhe antimafia e Barit, në kuadër të operacionit Ura, sipas dosjes italiane, rezulton të jetë një nga personazhet kryesorë të trafikut të narkotikëve, që bashkëpunonte me Elvis Doçin.
Në dosjen italiane ndër të tjerat thuhet se Adi Çoba, në cilësinë e kreut merrte dhe dërgonte në Itali korrierë që sillnin sasi të mëdha heroine dhe kokainë, të furnizuara nga Shqipëria dhe Holanda përmes veprimtarisë së paligjshme të anëtarëve të tjerë të grupit. “Anëtarët e grupit, secili në mënyrë të vetëdijshme dhe aktive, kryenin funksione të ruajtjes dhe shitjes së substancës narkotike që vinte nga jashtë, për qëllime fitimi, duke pasur gjithashtu detyra të përcaktuara në marrjen e sasive të mëdha të substancave narkotike në portet e Shqipërisë dhe Holandës, duke i ruajtur dhe më pas duke i shpërndarë ato në territorin italian, si dhe duke administruar pagesat dhe logjistikën përkatëse”, thekson më tej dosja, teksa ndalet tek roli i Adi Çobës.
Më tej, zbardhen komunikimet mes tij dhe të akuzuarve të tjerë si anëtarë të grupit kriminal, përfshirë dhe Elvis Doçin. Këtë të fundit, Nuredin Dumani i penduari i drejtësisë e ka konsideruar si një negociator të shkëlqyer në trafikun e drogës.
Nga hetimet ka rezultuar se grupi kriminal me bazë në Durrës ka furnizuar me sasi të mëdha heroine e më pas kokainë disa grupe të tjera në Itali.
Paratë e trafikut të palijshëm silleshin në Shqipëri përmes autobusëve të linjës 2-3 herë në javë, ndërsa investoheshin në pasuri të paluajtshme.
Nën dyshimet për pastrim parash është firmosur urdhër ndalim edhe për Nexhmedin Danaj, pronari i televizionit Vlora Cable, pasi rezulton se ka kryer trasferta të paligjshme parash.
