Gjykata e Lartë ka prishur vendimin e Gjykatës së Posaçme të Apelit për Blendi Tetën dhe e ka kthyer dosjen për rigjykim me një tjetër trupë gjykuese. Teta ishte dënuar me 25 vite burgim për përfshirje në vrasjen e ish-policit Santiago Malko, ngjarje e ndodhur në rrugën Xhanfize Keko më 27 gusht 2019. Vrasja e Malkos u organizua dhe financua nga klani kriminal i drejtuar nga Leonard Duka, i njohur si kundërshtari më i fortë i Ervis Martinajt. Pasi dështoi në përpjekjen për të vrarë Martinajn, u ekzekutua Malko. Martinaj u zhduk pa gjurmë më vonë, në gusht të vitit 2022, dhe ende sot nuk dihet asgjë për fatin e tij.
