Argita Malltezi, vajza e ish-kryeministrit Sali Berisha, reagoi sot për mediat lidhur me akuzat ndaj babait të saj, duke i cilësuar ato si një “dekoratë”. Ajo theksoi se Berisha ka kaluar një vetting 30-vjeçar të pasurisë së tij dhe familjes, duke mos rezultuar asnjëherë në shkelje ligjore apo përfitime të paligjshme.
“Aktakuza është një dekoratë për Sali Berishën pasi ai ka kaluar një vetting 30-vjeçar të pasurisë së tij dhe familjarëve të tij. Berisha nuk ka shkelur kurrë ligjin gjatë ushtrimit të funksioneve publike dhe nuk ka përfituar asnjëherë në mënyrë të paligjshme,” tha Malltezi.
Ajo gjithashtu shtoi se Sali Berisha nuk ka favorizuar kurrë Jamarbër Malltezin në çështjen e privatizimit të ish-kompleksit “Partizani”, duke theksuar se pronat familjare janë të ligjshme dhe se çdo akuzë që lidhet me këtë çështje bazohet në falsifikime dhe mashtrime.
“Dokumentet tona provojnë kthimin e ligjshëm të pronës, dhe akuzat për shpronësimin e saj nga Italia janë të pabaza,” deklaroi Malltezi.
Kjo deklaratë vjen pas akuzave të fundit ndaj Sali Berishës për përfshirje në çështje korrupsioni dhe keqpërdorim të funksioneve publike.
