Ish-prokurori Anton Martini është emëruar drejtor i ri i Hetimit Tatimor, një strukturë kyçe për luftën kundër evazionit fiskal. Ai u prezantua dje në këtë post nga Drejtori i Përgjithshëm i Tatimeve, Ilir Binaj. Martini, i larguar nga sistemi i drejtësisë për probleme me pasurinë, befas zgjidhet nga qeveria për të kontrolluar evazionin e biznesit.
Martini, i cili u shkarkua nga Kolegji i Posaçëm i Apelimit në vitin 2021 për shkak të problemeve me pasurinë dhe evazionin fiskal, nuk arriti të kalonte vettingun. Ky vendim i dha fund aspiratës së tij për t’u bërë pjesë e Prokurorisë së Posaçme, për të cilën ai ishte renditur i dyti nga KLP.
Emërimi i tij në një pozicion të tillë, kur debati për reformën në drejtësi është në kulmin e tensioneve, është një tregues i shpërfilljes së qeverisë ndaj institucioneve të drejtësisë. Kjo lëvizje mund të shihet si një kartë e fortë elektorale për Edi Ramën, por duket se kahu dhe ngjyra e kësaj karte ndryshojnë sa herë që i shërben interesave të tij. Vetëm dy vite më parë, kryeministri kërkonte nga institucionet e reja të drejtësisë që të hetonin dhe dënonin prokurorët dhe gjyqtarët e larguar nga vettingu.
Madje, Edi Rama këmbëngulte në hetimin e tyre, duke ua lënë këtë detyrë institucioneve të drejtësisë.
“Nuk mund të vihet në pikëpyetje besimi tek Drejtësia e Re. Nëse nuk hetohen këto dy çështje, i bie të mbetemi në një vakum. Nuk ka pasur mundësi për të marrë të pandehur gjykatës dhe prokurorë që një institucion si Vettingu i ka nxjerrë me fakte korruptive. Si ka mundësi? Kjo është e pamundur dhe e pajustifikueshme, madje e patolerueshme. Nuk është ndërhyrje kjo. Ku janë prokurorët e dalë para drejtësisë? Do thoni që s’ka kohë? Është e pajustifikueshme dhe e patolerueshme,” – shprehej Rama dy vite më parë.
Mjaftuan vetëm dy vite që kryeministri të ndryshonte mendje dhe qëndrim, duke emëruar një subjekt të larguar nga vettingu në krye të një drejtorie të rëndësishme. Anton Martini mund të mos jetë subjekt i asnjë hetimi për sa kohë është emëruar në një post të tillë. Por kryeministri tani përballet me një dilemë: cilin të besojë? Institucionet e vettingut që e larguan Martinin për evazion fiskal, apo ish-prokurorin, mbi shpatullat e të cilit rëndon tashmë përgjegjësia për të hetuar krimin tatimor?
Ndërsa dilema e qytetarëve mund të jetë: kë Ramë të bësojnë? Ai që kërkonte me insistim hetimin nga drejtësia të ish-prokurorëve që i largonte vettingu, apo ky që i emëron në poste drejtuese të institucioneve publike?/VNA/
