Ish-prokurori Anton Martini, i cili u shkarkua nga detyra pas një vendimi të Kolegjit të Posaçëm të Apelimit në vitin 2021 për deklarim të pasaktë të pasurisë, është emëruar si drejtori i ri i Hetimit Tatimor. Martini u prezantua dje në këtë rol nga Drejtori i Përgjithshëm i Tatimeve, Ilir Binaj.
Ky emërim ka ngjallur reagime, pasi Martini nuk arriti të kalonte procesin e vettingut, për shkak të problemeve me justifikimin e pronave dhe pasurive të tij. Pas shkarkimit nga detyra e prokurorit, ai humbi edhe mundësinë për të qenë pjesë e Prokurorisë së Posaçme pasi u rendit i dyti nga Këshilli i Lartë i Prokurorisë.
Në postin e ri, Martini do të jetë në krye të luftës kundër evazionit fiskal, në një nga strukturat më të rëndësishme të Administratës Tatimore. Emërimi i tij ka ngritur pikëpyetje për mënyrën e përzgjedhjes së drejtuesve në pozicione të rëndësishme, veçanërisht për individë që kanë pasur probleme me integritetin gjatë procesit të vettingut.
