Një aksident është regjistruar këtë të hënë në Unazën e Madhe, pranë zonës së Farkës, ku janë përfshirë dy kamionë. Sipas të dhënave paraprake, njëri prej mjeteve është tip karrotrec dhe transportonte një fadromë.
Nga përplasja, mjetet kanë përfunduar të përmbysura në mes të rrugës, duke shkaktuar edhe vështirësi në qarkullim. Nga vendi i ngjarjes raportohet se dyshohet që një person të ketë mbetur i plagosur.
Në vendngjarje kanë mbërritur shërbimet përkatëse, ndërsa po punohet për zbardhjen e rrethanave dhe shkaqeve të aksidentit. Informacionet janë paraprake dhe pritet të ketë të dhëna të tjera në vijim.
