Një aksident rrugor është regjistruar në afërsi të fshatit Vodicë në Poliçan, në vendin e quajtur “Çesma e Thatë”, ku tre anëtarë të së njëjtës familje kanë mbetur të plagosur.
Automjeti tip “Toyota Yaris”, me targa AC 173 AI, ka dalë nga rruga gjatë marrjes së një kthese dhe ka përfunduar në kanalin kullues anësor.
Si pasojë e aksidentit mbetën të plagosur Veiz Shermalli, 60 vjeç, Rabushe Shermalli, 78 vjeçe dhe Liljana Shermalli, 58 vjeçe, të tre banues në fshatin Vodicë të Bashkisë Poliçan. Mësohet se automjeti drejtohej nga 58-vjeçarja.
Të plagosurit u transportuan në Spitalin Rajonal të Beratit, ku morën ndihmën e nevojshme mjekësore. Për shkak të frakturave të pësuara, 78-vjeçarja Rabushe Shermalli është dërguar më pas në Spitalin e Traumës në Tiranë për trajtim të specializuar.
Grupi hetimor i Sektorit të Qarkullimit Rrugor po kryen veprimet në vendngjarje për të përcaktuar shkaqet e aksidentit. Paraprakisht dyshohet se automjeti mund të ketë rrëshqitur gjatë marrjes së kthesës, ndërsa rrethanat e plota mbeten objekt hetimi.
