Debati për komisionin hetimor të shëndetësisë u zhvendos sot në Kuvend, ku deputetët e Partisë Demokratike kërkuan zgjatjen e afatit të komisionit hetimor me tre javë. Deputeti Gazment Bardhi theksoi nevojën për masa ndaj asaj që ai e quajti kërcënim nga Ilir Beqaj.
“Merrni masa për një kriminel që i ka kërcënuar deputetët në ambientet e Kuvendit. Lejoni funksionimin normal të komisionit hetimor. Kush është kriminel e përcakton prokuroria dhe gjykata. Ai vjen në Kuvend si dëshmitar dhe duhet t’i jepet mundësia,” tha Bardhi.
Situata u tensionua më tej me një debat të ashpër mes deputetit demokrat Flamur Noka dhe kryeparlamentares Elisa Spiropali. Noka përmendi seancën e djeshme të komisionit, duke e quajtur Ilir Beqajn “hajduti 2 metra”. Spiropali i tërhoqi vëmendjen që të mos përdorte fyerje dhe të respektonte procedurën.
“I burgosur për vjedhje guxon të intimidojë Kuvendin dhe deputetët e komisionit hetimor,” deklaroi Noka. “Në vend që të japë llogari, ishte i thirrur në betim.” Ndërsa Spiropali e kundërshtoi: “Çdo njeri ka të drejtën e dinjitetit. Ju tërheq vëmendjen që të mos përmendni.”
Noka vijoi: “Ajo sjellje tregon qasjen tuaj për të mbrojtur hajdutët. Po ashtu vepruat edhe me Olta Xhaçkën dhe Frida Krifcën. Komandanti i Gardës duhet të mbajë përgjegjësi. Mbrëmë, në sallën e komisionit nuk kishte asnjë punonjës të Gardës, dhe hajduti 2 metra bashkë me avokatin e tij guxonin të intimidonin deputetët.”
Spiropali përmbylli debatin duke theksuar: “Zoti Noka, përfundoni fjalën tuaj, edhe pse nuk është për procedurë. Hetimi nuk është penguar nga askush.”
