Pas javësh heshtjeje ndërsa protestat qytetare vijojnë në Tiranë, Presidenti i Republikës, Bajram Begaj, ka reaguar për herë të parë lidhur me zhvillimet politike dhe shoqërore në vend.
Gjatë ceremonisë së 100-vjetorit të krijimit të Prefekturës së Tiranës, Begaj iu referua situatës aktuale në kryeqytet, ku prej javësh qytetarë të shumtë po protestojnë duke shprehur pakënaqësitë dhe kërkesat e tyre ndaj qeverisë.
Presidenti theksoi se e drejta për t’u shprehur dhe për të marrë pjesë në jetën publike është një e drejtë kushtetuese, e cila duhet të ushtrohet në përputhje me ligjin dhe normat demokratike.
“Ky aktivitet zhvillohet në një moment kur qytetarë po shprehin publikisht shqetësimet dhe pritshmëritë e tyre në mënyrë paqësore. Në respekt të pozicionit kushtetues dhe neutralitetit kushtetues, mund të theksoj se e drejta për t’u shprehur dhe për të marrë pjesë në jetën publike është një vlerë e mbrojtur nga Kushtetuta, e cila duhet të ushtrohet në pajtim me Kushtetutën dhe ligjet e vendit”, deklaroi Begaj.
Kreu i shtetit vlerësoi se konsolidimi i demokracisë dhe zhvillimi i qëndrueshëm i vendit kërkojnë angazhim të përbashkët të qytetarëve dhe institucioneve, duke theksuar rëndësinë e respektimit të Kushtetutës, shtetit të së drejtës dhe interesit publik.
Në deklaratën e tij, Begaj nënvizoi se do të vijojë të mbetet i përkushtuar në mbrojtjen e të drejtave dhe lirive themelore të qytetarëve, si dhe në nxitjen e dialogut dhe bashkëpunimit institucional.
Reagimi i Presidentit vjen në një moment kur protestat në Tiranë kanë hyrë në javën e katërt dhe kur kërkesat e protestuesve janë bërë gjithnjë e më politike, duke përfshirë dorëheqjen e kryeministrit dhe mbajtjen e zgjedhjeve të parakohshme. Megjithëse Begaj nuk mori pozicion mbi kërkesat konkrete të protestuesve, ai dha mbështetje për të drejtën e qytetarëve që të shprehin publikisht dhe në mënyrë paqësore shqetësimet e tyre.
