Në selinë e Partisë Socialiste u zhvillua një mbledhje rreth 60-minutëshe me drejtuesit politikë në qarqe dhe disa ministra, ku është diskutuar mbi organizimin e brendshëm të partisë dhe menaxhimin e problematikave të qytetarëve.
Kryeministri Rama ka theksuar nevojën që fokusi kryesor i punës së strukturave të jetë te shqetësimet e qytetarëve dhe zgjidhja e tyre në terren, duke nënvizuar rëndësinë e kontaktit të drejtpërdrejtë dhe jo zëvendësimin e tij nga aktiviteti në rrjetet sociale apo hapësira digjitale.
Gjatë takimit është diskutuar edhe nevoja për një koordinim më të shpejtë mes ministrave, deputetëve dhe administratës, me qëllim adresimin më efikas të problematikave që ngrihen nga qytetarët në qarqe. Në këtë kuadër, është përmendur edhe forcimi i rolit ndërmjetësues mes niveleve të ndryshme të përfaqësimit politik dhe ekzekutiv.
Po ashtu, vëmendje i është kushtuar edhe komunikimit publik dhe aktivitetit në rrjetet sociale, ku është kërkuar që drejtuesit politikë dhe ministrat të jenë më aktivë, në një kohë kur debati publik dhe protestat po zhvendosen gjithnjë e më shumë edhe në hapësirën digjitale.
Ndërkohë, mësohet se pas kësaj mbledhjeje ka vijuar një tjetër takim në selinë e PS-së me ekipin digjital të partisë.
