Sot në orën 19:00 pritet të zhvillohet protesta e 24-të para Kryeministrisë, ku qytetarët do të rikthehen përballë godinës së qeverisë duke kërkuar largimin e saj dhe dorëheqjen e pakushtëzuar të kryeministrit Edi Rama.
Tubimi konsiderohet si kulm i mobilizimit qytetar pas më shumë se tri javësh protesta të pandërprera. Sipas organizatorëve dhe pjesëmarrësve, protesta ka evoluar përtej kauzës fillestare, duke u shndërruar në një lëvizje më të gjerë kundër korrupsionit, keqqeverisjes, mungesës së llogaridhënies dhe emigrimit të të rinjve.
Në këtë valë pakënaqësie, përfshirja e diasporës shihet si tregues se kritikat ndaj qeverisë shtrihen përtej kufijve të vendit.
Tubimi është parashikuar të nisë në sheshin “Skënderbej”, nga ku më pas protestuesit do të marshojnë drejt Kryeministrisë. Protesta e radhës shihet si një tjetër test për vazhdimësinë e lëvizjes qytetare që prej javësh ka dominuar debatin politik në vend.
