Kryeministri Edi Rama duket se nuk po gjen qetësi përballë revoltës qytetare dhe në pamundësi për të ndalur hovin e protestave masive kundër qeverisë së tij, i është rikthyer sërish arsenalit të vjetër të sulmeve dhe linçimeve publike përmes rrjeteve sociale.
Pas sulmeve ndaj aktivistit Dritan Goxhaj, shënjestra e radhës e kreut të qeverisë është bërë Arben Kola, një prej organizatorëve të protestave në Tiranë. Për të realizuar goditjen, Rama ka shfrytëzuar kësaj radhe komentin e hoxhës Mustafa Tërniqi në Instagram, duke aplikuar hapur strategjinë e njohur për të gjuajtur dy zogj me një gur dhe për të nxitur përçarjen mes vetë protestuesve.
Pasi ka peshkuar komentin ku hoxha shprehte pakënaqësi ndaj Arben Kolës, kryeministri ka vrapuar ta përdorë këtë replikë si municion politik për të goditur në dy fronte. Nga njëra anë, ai legjitimon sulmet e tij të hershme ndaj Kolës duke u shprehur se e kishte ditur mirë se kush ishte ky personazh kur ua tregoi shqiptarëve këtë "hero të flamingove".
Ndërsa nga ana tjetër, me një gjuhë intimiduese dhe arrogance, Rama i ka dhënë leksione fetare hoxhës, duke i kërkuar llogari se përse është futur në protestë, pasi sipas tij vendi i tij është vetëm në xhami. Kryeministri shkon më tej duke e akuzuar hoxhën se po bën punën e shejtanit për të futur xixa e ndasi fetare mes shqiptarëve.
Përtej leksioneve dhe sulmeve, qëllimi kryesor i Ramës nuk ka të bëjë fare me parimet e besimit apo shqetësimin për harmoninë sociale, por mbetet nxitja e pastër e përçarjes mes protestuesve në shesh. Duke u kapur pas çdo komenti të qytetarëve, kryeministri përpiqet të devijojë vëmendjen nga thelbi i revoltës, ku qytetarët janë bashkuar me qëllimin e vetëm për të larguar një qeveri të superkorruptuar.
