Ish-luftëtari i UÇK-së, Dritan Goxhaj, lexoi mbrëmjen e së hënës pesë kërkesat e protestuesve ndaj qeverisë së Edi Ramës. Menjëherë pas daljes së tij në podium, ndaj tij nisën sulmet nga përfaqësues të mazhorancës, të cilët e cilësuan si “zëdhënës të Iranit”.
“Kështu thoshin derrat e kënaqur migjenianë të segmentit ‘intelektual’ të protestës, nuk ka lidhje Irani… Mos harroni çfarë ju kam thënë qysh në fillim: dy fitimtarë do të dalin kur kësaj proteste t’i bien të tëra puplat fallco të flamingove, Partia Socialiste që do të bëhet më e fortë dhe qeverisja jonë që do të përmirësohet shumë ndjeshëm”, shkroi Rama.
Edhe kreu i grupit parlamentar të PS-së, Taulant Balla, e quajti Goxhajn “zëdhënës të Republikës Islamike të Iranit”, duke e akuzuar se prej kohësh ka mbrojtur regjimin iranian dhe ka sulmuar SHBA-në, Izraelin dhe Shqipërinë.
Kush është Dritan Goxhaj
Dritan Goxhaj është një ish-oficer i Ushtrisë Shqiptare dhe ish-luftëtar i Ushtrisë Çlirimtare të Kosovës (UÇK). Ai u bë i njohur në opinionin publik për shkak të angazhimit të tij në Luftën e Kosovës dhe përfshirjes së tij të mëvonshme në një proces gjyqësor të lidhur me Dhomat e Specializuara të Kosovës në Hagë.
Goxhaj është djali i kolonelit të njohur shqiptar, Dilaver Goxhaj, i cili iu bashkua vullnetarisht UÇK-së dhe shërbeu si zëvendësshef i Shtabit të Përgjithshëm të saj gjatë luftës.
Edhe Dritani iu bashkua luftës në Kosovë, duke u rreshtuar në radhët e UÇK-së. Me formimin e tij si oficer aviacioni në Shqipëri, ai u autorizua nga Shtabi i Përgjithshëm i UÇK-së të mbante kontakte dhe të shërbente si oficer ndërlidhës me komandën e forcave amerikane dhe trupat e NATO-s.
Më 31 korrik 2023, Goxhaj u arrestua në Tiranë me urdhër të Dhomave të Specializuara të Kosovës në Hagë. Prokuroria Speciale e akuzoi për “frikësim gjatë procedurës penale” dhe “pengim të personit zyrtar në kryerjen e detyrave zyrtare”, me pretendimin se kishte publikuar emrat e disa dëshmitarëve të mbrojtur. Vetë Goxhaj e kundërshtoi akuzën, duke argumentuar se kishte shprehur vetëm një opinion.
Më 10 tetor 2023, Gjykata e Apelit në Tiranë refuzoi ekstradimin e tij në Hagë dhe urdhëroi lirimin e menjëhershëm. Më pas, edhe Gjykata e Lartë la në fuqi këtë vendim.
Në vitet e fundit, Goxhaj është bërë i njohur edhe për analizat e tij mbi çështjet ushtarake dhe gjeopolitike. Gjatë konfliktit mes Izraelit dhe Iranit, ai ka mbajtur qëndrime kritike ndaj ndërhyrjes ushtarake amerikane dhe izraelite, duke argumentuar se ajo përbën një aventurë të rrezikshme dhe se Irani nuk mund të mposhtet lehtësisht ushtarakisht. Ai ka paralajmëruar se përshkallëzimi i konfliktit mund të destabilizojë të gjithë rajonin dhe ka kritikuar politikën amerikane në Lindjen e Mesme.
Këto qëndrime kanë sjellë akuza nga kundërshtarët e tij se ai mban pozicione pro-iraniane, ndërsa mbështetësit e tij argumentojnë se bëhet fjalë për analiza ushtarake dhe kundërshtim ndaj ndërhyrjeve të jashtme, e jo për mbështetje të regjimit iranian.
