Kryeministri izraelit Benjamin Netanyahu kryeson rezultatet paraprake të zgjedhjeve parlamentare në Izrael, por mbetet ende larg shumicës së nevojshme për formimin e qeverisë së re.
Sipas të dhënave paraprake, pas numërimit të 84% të votave, blloku politik i Netanyahut ka siguruar 54 mandate, ndërsa opozita e udhëhequr nga Gadi Eisenkot numëron 49 vende në parlament.
Ndërkohë, partitë arabe pritet të përfaqësohen me 17 deputetë në Knesset, parlamentin izraelit me 120 vende.
Pavarësisht epërsisë në mandate, Netanyahu nuk ka arritur pragun prej 61 deputetësh, që përbën shumicën parlamentare të nevojshme për krijimin e një qeverie.
Në të njëjtën situatë ndodhet edhe blloku opozitar, i cili nuk disponon numrat e mjaftueshëm për të siguruar i vetëm shumicën.
Në këto kushte, partitë arabe mund të kenë një rol të rëndësishëm në negociatat për krijimin e një shumice parlamentare.
Megjithatë, situata mbetet e hapur, pasi procesi i numërimit vijon dhe rezultatet përfundimtare ende nuk janë zyrtarizuar.
