Benjamin Netanyahu rrezikon të humbasë pushtetin pas zgjedhjeve parlamentare në Izrael. Sipas exit poll-eve të publikuara pas mbylljes së qendrave të votimit, blloku i kryeministrit izraelit nuk arrin shumicën e nevojshme për të formuar qeverinë, ndërsa opozita e udhëhequr nga Gadi Ajzenkoti del përpara, por gjithashtu mbetet larg 61 mandateve që garantojnë kontrollin e parlamentit.
Projeksioni i televizionit publik Kan 11 i jep opozitës 53 mandate, koalicionit të Netanyahut 50 dhe forcave të tjera politike 17 vende në parlamentin me 120 deputetë.
Likud, partia e Netanyahut, mbetet forca më e madhe politike sipas një tjetër projeksioni, atij të Kanalit 12, me 24 mandate, ndërsa partia Jashar e Ajzenkotit parashikohet të sigurojë 22 vende.
Zgjedhjet janë shoqëruar me një pjesëmarrje që ka kaluar 74%, ndërsa Ajzenkoti i ka interpretuar rezultatet paraprake si shprehje të mungesës së besimit të qytetarëve ndaj Netanyahut.
Megjithatë, rezultati nuk përcakton ende fituesin e pushtetit. Asnjëri prej blloqeve nuk ka shumicën parlamentare dhe formimi i qeverisë do të varet nga rezultatet përfundimtare dhe negociatat për koalicion.
Rezultatet zyrtare pritet të shpallen deri më 4 nëntor. Deri atëherë, Netanyahu mbetet në detyrë, ndërsa Izraeli përballet me mundësinë e një ndryshimi politik pas zgjedhjeve që kanë vënë në diskutim vazhdimësinë e qeverisjes së tij.
