Për herë të parë, në zgjedhjet e 11 majit, shqiptarët që jetojnë jashtë vendit do të kenë mundësinë të shprehin vullnetin e tyre politik pa pasur nevojë të udhëtojnë për të votuar në Shqipëri. Ky është hapi i parë i procesit, pasi regjistrimi përmes Platformës Elektronike të Regjistrimit (PER) ka nisur dhe do të vazhdojë deri më 4 mars.
Regjistrimi: Për t'u regjistruar, emigranti duhet të krijojë një llogari në platformën (PER). Gjatë paraqitjes së kërkesës për t'u regjistruar në listën e zgjedhësve jashtë vendit, sipas rregullave të miratuara nga Komisioni Rregullator, zgjedhësi duhet të ngarkojë në platformë të paktën një dokument nga lista e mëposhtme, i cili vërteton qëndrimin e tij jashtë Shqipërisë:
Certifikatë pronësie ose dokument ekuivalent që tregon pronësinë e banesës në shtetin e rezidencës;
Dokument që vërteton rezidencën në shtetin e huaj, i lëshuar nga autoritetet përkatëse;
Kontratë qiraje ose huapërdorje të banesës;
Dokumente bankare (kontratë kredie, vërtetim bankar etj.) që përmbajnë adresën e banimit;
Kontratë furnizimi ose faturë të furnizimit me ujë në banesë;
Kontratë furnizimi ose faturë të energjisë elektrike/gazit në banesë;
Kontratë ose faturë të shërbimit digjital të transmetimeve audiovizive;
Kontratë ose faturë të shërbimit të internetit të telefonisë fikse;
Dokument i lëshuar nga organet kompetente të shtetit të rezidencës, që vërteton qëndrimin në një institucion shëndetësor, kamp emigracioni ose të ngjashëm;
Dokument pronësie ose ekuivalent, i lëshuar në shtetin e huaj, që vërteton pronësinë e banesës;
Leje drejtimi (patentë) nëse adresa e banimit është e shënuar;
Ose çdo dokument tjetër që provon qëndrimin e shtetasit shqiptar në adresën e deklaruar jashtë vendit.
Numri i shtetasve shqiptarë që mund të regjistrohen në të njëjtën adresë përmes platformës nuk mund të kalojë 6 persona. Përjashtime mund të bëhen vetëm në raste të arsyetuara, dhe pas paraqitjes së dokumentacionit përkatës, platforma mund të lejojë regjistrimin e më shumë se 6 shtetasve.
Pas regjistrimit, KQZ do të informojë emigrantin nëse kërkesa është miratuar apo jo. Nëse kërkesa refuzohet, emigranti do të udhëzohet mbi dokumentet që duhen plotësuar për të mundësuar miratimin. Procesi i regjistrimit konsiderohet i suksesshëm kur zgjedhësi paraqet të dhëna të plota dhe kërkesa miratohet.
Është e rëndësishme të theksohet se për të mbuluar plotësisht koston e votës, do të kërkohen ndryshime ligjore, për të cilat është i nevojshëm konsensusi i opozitës.
