Presidenti i Serbisë, Aleksandar Vuçiç, ka deklaruar se mund të japë dorëheqjen në një të ardhme të afërt, duke thënë se mandati i tij po i afrohet fundit.
Duke folur për mediat në Pekin, në nisje të vizitës së tij zyrtare në Kinë, Vuçiç tha se është e mundur që së shpejti të paraqesë dorëheqjen, duke lënë të hapur skenarët për zhvillimet politike në vend.
Ai gjithashtu ka mohuar pretendimet për pjesëmarrjen e tij në protestën e mbajtur mbrëmjen e kaluar në sheshin Slavija në Beograd, duke e cilësuar atë si një tubim pa peshë dhe pa përmbajtje të qartë.
Sipas tij, protesta nuk përbën shqetësim serioz për autoritetet, ndërsa akuzoi organizatorët për incidentet e ndodhura pas përfundimit të tubimit.
Vuçiç tha se sipas vlerësimeve të tre shërbimeve të sigurisë, në protestë kanë marrë pjesë mes 30,500 dhe 34,300 persona, duke shtuar se autoritetet kanë pranuar shifrën më të lartë të raportuar.
Në të njëjtën kohë, ai njoftoi se Partia e tij Progresive Serbe do të organizojë tubime nga 26 deri më 28 qershor, ku sipas tij mesazhet politike do të kenë më shumë rëndësi sesa numri i pjesëmarrësve.
