Deputetët dhe mbështetësit e Partisë Demokratike i janë bashkuar këtë të shtunë protestës së studentëve në Tiranë, duke marshuar nga Kryeministria drejt Ministrisë së Arsimit, ku të rinjtë janë mbledhur për të vijuar tubimin e tyre kundër qeverisë.
Marshimi i opozitës vjen në ditën e 19-të të protestave studentore, gjatë të cilave të rinjtë kanë kërkuar dorëheqjen e kryeministrit Edi Rama.
Protestuesit janë zhvendosur nga bulevardi “Dëshmorët e Kombit” drejt Ministrisë së Arsimit, në shenjë mbështetjeje për studentët dhe kërkesat e tyre.
Protesta e thirrur nga Partia Demokratike zhvillohet pa praninë e kryetarit të saj, Sali Berisha, ndërsa në marshim marrin pjesë deputetë dhe përfaqësues të opozitës.
