Protesta studentore ka hyrë në ditën e 19-të, ndërsa të rinj dhe qytetarë janë mbledhur këtë të shtunë përpara Ministrisë së Arsimit në Tiranë, duke kërkuar dorëheqjen e kryeministrit Edi Rama dhe largimin e qeverisë.
Në protestë janë bashkuar edhe të rinj shqiptarë që jetojnë jashtë vendit, të cilët kanë shprehur mbështetjen për kërkesat e studentëve.
Një prej të rinjve të ardhur nga diaspora, theksoi rëndësinë e përfshirjes së shqiptarëve që jetojnë jashtë vendit në zhvillimet politike dhe shoqërore të Shqipërisë. Ai u shpreh se vendi ka nevojë për kontributin e diasporës, ndërsa kërkoi largimin nga politika të Edi Ramës dhe Sali Berishës.
Ndërkohë, studentët vijojnë t'i qëndrojnë kërkesës për dorëheqjen e kryeministrit Rama, duke refuzuar çdo mundësi dialogu me të.
Ata kanë deklaruar se kërkesa për largimin e kreut të qeverisë është e panegociueshme, ndërsa protestat po vijojnë prej 19 ditësh.
