Dy shtetas nga Kosova, të shpallur në kërkim ndërkombëtar nga autoritetet gjermane, janë arrestuar në pikën kufitare të Morinës, pasi rezultonin të dënuar me nga 15 vite burg secili për vjedhje me dhunë dhe dëmtim prone.
Sipas njoftimit të Policisë, në pranga kanë rënë shtetasit G. M., 22 vjeç, dhe F. B., 24 vjeç, të dy banues në Vushtrri të Kosovës. Arrestimi i tyre u realizua nga shërbimet e Policisë Kufitare Morinë, në kuadër të operacionit policor të koduar “Wanted”.
Dy të rinjtë ishin shpallur në kërkim ndërkombëtar nga Interpol Wiesbaden, pasi Gjykata e Erfurtit në Gjermani, më 1 qershor 2026, i kishte dënuar me nga 15 vite burgim secilin për veprat penale “Vjedhje me dhunë e kryer në bashkëpunim” dhe “Dëmtim prone”, të parashikuara nga Kodi Penal gjerman.
Autoritetet shqiptare bëjnë me dije se arrestimi është kryer me qëllim ekstradimin e tyre drejt Gjermanisë, ku do të përballen me ekzekutimin e dënimeve të dhëna nga drejtësia gjermane.
Ndërkohë, Interpol Tirana, në bashkëpunim me Interpol Wiesbaden, po vijon procedurat për finalizimin e ekstradimit të dy shtetasve kosovarë.
