Gjykata e Posaçme kundër Korrupsionit dhe Krimit të Organizuar (GJKKO) ka konfirmuar masën e sigurisë “arrest në burg” për 29-vjeçarin Ardit Gjakrosa, i cili u ekstradua dy ditë më parë nga Gjermania drejt Shqipërisë.
I riu, me origjinë nga Mati, akuzohet nga Prokuroria e Posaçme (SPAK) për sigurimin e kushteve dhe mjeteve materiale për kryerjen e vrasjes, në kuadër të një grupi të strukturuar kriminal.
Ndaj Gjakrosës, Gjykata e Posaçme kishte caktuar që në maj të vitit 2024 masën e sigurisë “arrest në burg”, ndërsa ai ishte shpallur në kërkim ndërkombëtar.
Përveç akuzës për sigurimin e kushteve për kryerjen e vrasjes, 29-vjeçari akuzohet edhe për veprat penale “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Ekstradimi i tij u realizua në kuadër të operacionit policor të koduar “The Wanted”, falë bashkëpunimit mes Interpol Tiranës dhe Interpol Wiesbaden në Gjermani.
Pas mbërritjes në Shqipëri, Gjakrosa u përball me Gjykatën e Posaçme, e cila vendosi të lërë në fuqi masën e sigurisë “arrest në burg”, ndërsa ai do të vijojë të përballet me akuzat e ngritura nga SPAK.
