Pak orë para protestës së paralajmëruar të studentëve shqiptarë në Maqedoninë e Veriut ka reaguar ministri i Drejtësisë, Igor Filkov, i cili është shprehur se nuk do të ketë provim të Jurisprudencës në gjuhën shqipe.
Filkov tha se çështja është e mbyllur dhe se nuk ka më hapësirë për diskutime, duke theksuar se provimi i jurisprudencës është provim profesional dhe jo proces administrativ.
“Mendoj se ajo çështje është mbyllur. Nuk kemi më për çfarë të komentojmë”, u shpreh ai.
Ministri shtoi se qeveria aktuale nuk do të lejojë interpretime politike të ligjeve dhe Kushtetutës, duke theksuar se shteti duhet të funksionojë vetëm mbi bazën e tyre.
Ai theksoi gjithashtu se “koha e interpretimeve politike ditore ka përfunduar”, ndërsa shtoi se Kushtetuta nuk mund të jetë temë debatesh televizive apo presionesh publike.
