Kryeministri i Maqedonisë së Veriut, Hristijan Mickoski, ka deklaruar se është i gatshëm të diskutohet çështja e përdorimit të gjuhëve në provimin e jurisprudencës, duke theksuar se nuk ka pengesa që komunitetet të kenë të drejtën të përparojnë dhe të përdorin gjuhën e tyre brenda kornizës kushtetuese dhe ligjore.
Duke folur në kishën “Shën Sofia” në Ohër, gjatë akademisë solemne me rastin e Ditës së iluministëve mbarësllavë “Shën Kirili dhe Metodi”, Mickoski tha se arsimi është çelësi i zhvillimit dhe se vendimet në këtë drejtim duhet të tejkalojnë interesat politike, duke shmangur siç u shpreh ai “grackat nacionaliste”.
Ai shtoi se vendi duhet të fokusohet te arsimi si bazë e së ardhmes dhe se është i gatshëm të mbështesë çdo proces që sjell një sistem më të fortë dhe më cilësor arsimor.
“Unë jam i gatshëm të ndihmoj në çdo proces që nënkupton arsim më të mirë dhe më të fortë… shansi i vetëm për sukses është mësimi dhe hapja e perspektivave të reja”, u shpreh ai.
Sipas tij, çdo zgjidhje e ardhshme duhet të jetë e pranueshme për të gjithë dhe të mos ndikohet nga interesa politike apo ndasi që, sipas tij, mund të shfrytëzohen për qëllime të tjera.
