Tensione janë regjistruar këtë të shtunë përpara Ministrisë së Arsimit në Tiranë, ku protestuesit u kanë vënë flakën tre koshave të mbeturinave, ndërsa policia ka ndërhyrë me thirrje për ruajtjen e qetësisë dhe shmangien e akteve të dhunës.
Studentë dhe të rinj janë mbledhur për të 19-ën ditë radhazi përpara Ministrisë së Arsimit, duke vijuar protestën kundër qeverisë dhe kërkesën për dorëheqjen e kryeministrit Edi Rama.
Protestës i janë bashkuar edhe qytetarë dhe mbështetës të Partisë Demokratike, të cilët më herët marshuan nga Kryeministria drejt Ministrisë së Arsimit.
Situata është shoqëruar me tensione mes pjesëmarrësve, ndërsa forcat e policisë u kanë bërë thirrje protestuesve të distancohen nga dhuna, të mos bllokojnë rrugën dhe të vijojnë tubimin në mënyrë paqësore.
Ndërkohë, në fillim të Rrugës së Durrësit situata paraqitet më e qetë. Në këtë zonë ndodhen edhe deputetët e Partisë Demokratike, pas përplasjeve të regjistruara mes protestuesve pranë Ministrisë së Arsimit.
