Fation Bushgjoka, një prej autorëve të dyshuar të rrëmbimit dhe vrasjes së Renis Dobrës në Burrel rezulton me rekorde të shumta kriminale. Ai dyshohet të ketë kryer burg në Itali e Zvicër për cështje droge, ndërsa ka patur edhe precedentë të tjerë penalë. Fatjon Bushgjoka u arrestua mbrëmjen e së martës në zonën e Astirit në Tiranë. Dy vëllezërit e tij, Kristi e Aleksandër Bushgjoka u shpallën në kërkim. Ndërsa Petrit Cakrri alias Petrit Hoxha, dëshmitari okular i vrasjes së deputetit demokrat Azem Hajdari, më 12 shtator 1998 u arrestua në fshatin Golaj të Kukësit. Ndaj tyre rëndojnë dyshimet për akuzat e vrasjes me paramendim kryer në bashkëpunim dhe rrëmbimit e mbajtjes peng të personit.
VNA ka siguruar një dosje nga arkivat e ish-prokurorisë së Kurbinit, ku Fation Bushgjoka dhe kushëriri i tij janë hetuar dhe marrë të pandehur për vjedhje me dhunë kryer në bashkëpunim.
Por gjykata e Kurbinit atëkohë i ka dhënë pafajësinë, ndërkohë që vendimi është ankimuar nga prokuroria, e cila ka kërkuar dënimin e Fation Bushgjokës dhe kushëririt të tij me burgim.
Historia rezulton se më poshtë.
Më datë 15.06.2011 rreth orës 23.30, shtetasi Arben D, me detyrë polic në trupën e shoqërimit nnë Gjykatën për Krime të Rënda ka qenë duke lëvizur me mjetin tij tip benz 200 me targa TR979XXX me ngjyrë krem nga Zogu i Zi për në Kamez. Në Laprakë i kanë nxjerrë dorën dy persona për t’i marrë me makinë.
Ai ka ndaluar dhe dy personat i kanë kërkuar atij tu shërbente si taxi kundrejt një shume 2500 lekë dhe keshtu është bërë. Kur kanë mbërritur në Fushë-Mamurras, kanë lënë autostradën dhe kanë marrë rrugën e asfaltuar që të çon për në fshatin Adriatik. Pasi kanë ecur një pjesë rruge personi që ndodhej në sediljen e parë të pasagjerit i ka thënë Arbenit të futej pak në një rrugë parcele t’i dërgonte deri afër shtëpisë pasi kishte këmbën e sëmurë. Arbeni ka vazhduar rrugën ku në një moment ata i kanë thënë të ndalohet.
Personi që ishte në sedilen e pare si pasagjer, ka dalë nga makina dhe i ka thënë Arbenit: “të të orientoj të kthesh makinen”.
Në këto momente ka zbritur edhe personi tjetër që ndodhej në sediljen e pasme. Po kështu nga makina ka zbritur edhe Arbeni.
Personi që ishte ulur në vendin e parë i ka thënë shokut të tij, që ishte ulur, në sediljen e pasme: “Elion a ke lekë të vogla”. Ky është përgjigjur “të shoh”. Në këto momente personi tjetër i ka thënë Arbenit se të ka rënë goma e makinës.
Në momentin kur Arbeni është përkulur për të parë gomën, personi që doli nga sedilja e parë ka nxjerrë nga brezi një levë dhe e ka goditur në kokë. Po ashtu e ka goditur edhe personi tjetër.
Ndodhur në këtë situatë, polici ka tentuar të nxjerrë nga brezi armën e tij të shërbimit për tu vetëmbrojtur, por personi që gjatë lëvizjes me mjet ka qenë ulur në sediljen e parë, i ka marrë pistoletën dhe e ka goditur përsëri me qytë në kokë. Pastaj e kanë hedhur Arbenin në një kanal me ferra anë rrugës. Polici ka shpjeguar se kur ka rënë në kanal ka bërë si i vdekur që të mos e vrisnin.
Personi bjond që gjatë lëvizjes me mjet ka qenë ulur në sediljen e pasme, i ka thënë tjetrit “a mbarove me të”. Ai i është përgjigjur: “mbarova punë”. Sipas Arbenit, ai po shikonte në toke dhe thoshte “kam lënë gjurmët e duarve”. Më pas të dy personat, kanë ndezur maminën dhe janë larguar. Gjatë momentit të largimit, Arbeni thotë në dëshmi se ka dëgjuar edhe krisma arme.
