Përpjekjet e qeverisë për të emëruar në krye të BKH-së të besuarin e saj, që VNA denoncoi disa javë më parë, tashmë janë bërë të dukshme.
Emri që ka përplasur SPAK-un me qeverinë është ai i Haki Çakos, ish-drejtor i Përgjithshëm i Policisë së Shtetit, i cili është një nga 13 kandidatët në garë për të marrë drejtimin e institucionit që ndihmon SPAK-un në hetimet për bosët e krimit dhe politikanët e korruptuar.
Duket se Çako, një emër që nuk ishte lakuar thuajse fare si kandidat, plotëson të gjitha “kushtet” që i përshtaten qeverisë për të kontrolluar në mënyrë indirekte strukturën antikorrupsion.
Emërimi i tij në krye të BKH-së i mundëson qeverisë që të ketë informacion për çdo lëvizje të prokurorëve të posaçëm, sa i përket hetimeve, vëzhgimeve, sekuestrimeve, etj. Për këto arsye, Çako duhet në atë pozicion, për shkak se më herët e ka dëshmuar devotshmërinë e tij për të shërbyer.
Emri i tij është i lidhur ngushtë me ish-ministrin e Brendshëm Saimir Tahiri. Por mesa duket, Çako i shërben mirë shefit të radhës. Ndaj emri i tij është bërë shkak për përplasje të forta brenda SPAK mes anëtarëve të komisionit përzgjedhës.
Një prej anëtarëve të komisionit përzgjedhës me prokurorë të SPAK duket se favorizon Çakon, ndërsa drejtuesi Altin Dumani dhe një anëtar tjetër janë për një konkurs të hapur ku në finale të propozohet për emërim në KLP kandidati që kalon me sukses çdo fazë.
Lufta për të zgjedhur mes të preferuarit të qeverisë dhe të përzgjedhurit të SPAK duket se do të jetë e ashpër dhe për këtë janë në dijeni edhe institucionet ndërkombëtare që asistojnë Prokurorinë e Posaçme në aktivitetin e saj.
Nëse qëllimi i qeverisë nuk arrihet përmes ndikimit te komisioni përzgjedhës, burimet thonë se do të bëhet çmos që kandidatura e dërguar në KLP të rrëzohet pikërisht nga ky institucion, edhe pse kompetencat kufizuese të këtij parashikojnë vetëm “noterizimin” e kandidaturës që do të përzgjedhë komisioni i përbërë nga prokurorët e SPAK.
