Nga dy dokumente arkivore të vitit 1957 dhe 1958, njëri prej të cilëve i datës 4 dhjetor 1957 dhe i klasifikuar si “Tepër Sekret”, del qartë sesi pushteti ndërhynte drejtpërdrejt në manipulimin e kujtesës historike.
Në një shkresë drejtuar Liri Belishovës, anëtare e Byrosë Politike, Gjeneral-Major Zoi Themeli nga Ministria e Brendshme ngre alarmin për përfshirjen në një ekspozitë të organizuar për 45-vjetorin e Pavarësisë së Shqipërisë të fotografive të “tradhtarëve dhe spiunëve”, si Mehdi Frashëri, Mustafa Kruja dhe Hafiz Ali Korça.
Sipas dokumentit, këto foto i kishin shpëtuar kontrollit të rreptë të Partisë dhe Ministrisë së Brendshme. Në ekspozitë duheshin paraqitur vetëm fotografi të miratuara më parë, siç kërkohej edhe në dokumentin tjetër, një udhëzim dhe sqarim i drejtorit të Arkivës së Ministrisë së Brendshme.
Të dyja shkresat zbulojnë përpjekjen për të zhdukur nga hapësira publike figura historike që nuk përputheshin më me narrativën zyrtare. Mustafa Kruja, Mehdi Frashëri dhe Hafiz Ali Korça paraqiten si “armiq të popullit”, ndërsa për këtë të fundit theksohen edhe dënimet që kishin pësuar djemtë e tij, për ta portretizuar sa më negativisht.
Këto dokumenta janë dëshmi të qarta të mënyrës se si historia zyrtare shkruhej me porosi, për të legjitimuar pushtetin dhe për të kontrolluar kujtesën historike, dhe te kaluarën.
Teksti i dok 1:
REPUBLIKA POPULLORE E SHQIPERISE
MINISTRIA E P. TE MBRENDSHME
" SEKRETARIATI " Nr.01- 850
" TEPER SEKRET "
Ekzemplar Nr. 1
Tirane, me 4.12.1957
SHOQES LIRI BELISHOVA
SEKRETARE E KOMITETIT QENDROR TE P.P.SH. TIRANE
Ju njoftojme se veç fotografive te derguara ne Demokracite Popullore nga Agjensia Telegrafike Shqiptare, ne te cilat figurojne edhe tradhetaret e atdheut si Mustafa Kruja e Mehdi Frasheri, ne pallatin e kultures "Ali Kelmendi", me rastin e festes se 45 vjetorit te Indipendences se Shqiperise midis fotografive te patrioteve eshte ekspozuar dhe fotografia e Hafiz Ali Korçes, i cili ka qene pro regjimit te Zogut dhe i lidhur me okupacionin Italo-Gjerman, nje djale i eshte pushkatuar mbas çlirimit te Shqiperise dhe nje tjeter i denuar me 18 vjet burg si spiun i Italianeve dhe per aktivitet armiqesor.
Vet Hafiz Ali Korça si njeri i padeshirueshem ne vitin 1948
eshte shperngulur nga Tirana.
ME AUTORIZIM TE MINISTRIT P.MBRENDESH.
GJENERAL-MAJOR
( ZOI THEMELI )
