Tre vatra zjarri janë regjistruar këtë të premte në Gjirokastër, Maliq dhe Himarë, duke angazhuar forcat zjarrfikëse në disa zona të vendit. Temperaturat e larta, bimësia e thatë dhe era e fortë po favorizojnë përhapjen e flakëve, ndërsa situata paraqitet më problematike në jug.
Në zonën e Tërbuqit, në Gjirokastër, një zjarr i përmasave të mëdha ka përfshirë sipërfaqe me bar dhe shkurre të thata. Dyshohet se flakët janë shkaktuar fillimisht nga një automjet dhe më pas janë përhapur me shpejtësi. Era ka vështirësuar ndërhyrjen, ndërsa ekziston rreziku që zjarri të avancojë drejt zonave pranë fshatrave Labovë e Madhe dhe Labovë e Vogël. Në terren është angazhuar i gjithë efektivi i MZSH-së Gjirokastër.
Një tjetër vatër është aktivizuar në fshatin Vranisht të bashkisë Himarë, ku era e fortë dhe terreni i vështirë po pengojnë punën e zjarrfikësve. Flakët dhe shtëllungat e dendura të tymit janë të dukshme edhe në zonën e Malit të Çikës, ndërsa tymi ka mbuluar një pjesë të Vranishtit dhe territorit të Himarës. Situata atje vijon të mbetet dinamike.
Ndërkohë, zjarr është regjistruar edhe në fshatin Plovisht të Maliqit, ku janë përfshirë sipërfaqe me pyje dhe kullota. Dy mjete zjarrfikëse dhe efektivët e sektorit po punojnë për shuarjen e flakëve. Situata është vendosur nën kontroll, ndërsa vijon puna për fikjen e plotë të vatrës.
Deri më tani nuk raportohen persona të lënduar, ndërsa forcat zjarrfikëse vijojnë punën për të parandaluar përhapjen e flakëve drejt zonave të tjera.
