Korado Gështënja, një prej personave që akuzohet për pengmarrjen dhe zhdukjen e trupit të Jan Prengës, u arrestua në Britaninë e Madhe. Sipas Policisë së Shtetit, i shumëkërkuari u lokalizua dhe arrestua në Londër, ku fshihej prej kohësh me identitet të rremë.
Jan Prenga u rrëmbye në Kamzë dhe më pas u dërgua në Golden Resort në Shijak. Trupi i pajetë i tij u nxor prej andej dhe u zhduk. Për rrëmbimin dhe vrasjen e tij janë dënuar me burgim të përjetshëm Festim Bexhdili, kopshtari i Golden Resort, dhe Altin Hajri, pronari i resortit.
Ndërsa po gjykohen në GJKKO Dritan Rexhepi dhe Gentian Doçi Funiqi, si dhe disa të pandehur të tjerë. Prenga u rrëmbye për shkak se vëllai i tij, Astrit Prenga, vodhi një sasi të madhe droge në një port të Britanisë së Madhe, që dyshohet se i përkiste Rexhepit dhe Funiqit.
