Një e-mail kërcënues ka vënë në lëvizje Policinë e Shtetit mëngjesin e sotëm, pasi është dërguar njëkohësisht në adresat elektronike të disa institucioneve në qytete të ndryshme të vendit.
Në mesazhin, që sipas policisë kishte përmbajtje kërcënuese dhe terroriste, pretendohej se në ambientet e institucioneve ishin vendosur bomba.
Pas alarmit, strukturat e policisë nisën menjëherë kontrollet në institucionet e përfshira. Deri në këto momente, kontrollet nuk kanë zbuluar bombë apo ndonjë lëndë tjetër eksplozive.
Ndërkohë, hetimi është përqendruar te gjurmimi i personit që qëndron pas mesazhit. Drejtoria për Hetimin e Krimeve Kibernetike dhe Drejtoria e Antiterrorit, në bashkëpunim me agjenci të tjera ligjzbatuese, po punojnë për identifikimin e autorit dhe të adresës nga e cila është dërguar kërcënimi.
Policia e Shtetit deklaron se situata po mbahet nën kontroll dhe u bën thirrje qytetarëve të mos përfshihen nga paniku, ndërsa verifikimet dhe hetimet vijojnë.
