Kryeministri Edi Rama deklaroi se deri më sot nuk ka një projekt arkitektonik të miratuar për investimin në zonën e Zvërnecit dhe as një studim të përfunduar të ndikimit në mjedis.
Sipas tij, ajo që është miratuar deri tani është vetëm masterplani, i cili përcakton zonën zhvillimore dhe parametrat urbanistikë të mundshëm të projektit. Rama tha se materialet që qarkullojnë në publik nuk përfaqësojnë një projekt të miratuar, por vizualizime dhe materiale promovuese.
Kreu i qeverisë shpjegoi se pas refuzimit të variantit fillestar, investitorët kanë angazhuar pesë studio arkitekturore ndër më të njohurat në botë, si edhe ekspertë mjedisorë që po punojnë ende për studimin e ndikimit në mjedis. Sipas Ramës, ky studim nuk është përfunduar dhe nuk është paraqitur ende për miratim.
Deklarata vjen tre ditë pasi përplasjet në Zvërnec dhe protestat e mëpasshme në Tiranë e kthyen projektin në një nga çështjet më të debatueshme të ditëve të fundit, ndërsa qeveria po përpiqet të bindë opinionin publik se po protestohet kundër një projekti që, sipas saj, ende nuk ka marrë formë përfundimtare.
