Kreu i Partisë Demokratike, Sali Berisha, deklaroi se demokratët pritet të mbështesin protestën e organizuar nga Koalicioni për Familjen, e planifikuar për mbrëmjen e sotme, duke lënë të hapur mundësinë që të mos zhvillohet Foltorja e përjavshme.
Gjatë një deklarate për mediat, Berisha e lidhi mbështetjen për protestën me kundërshtimin e tij ndaj asaj që e cilësoi si përfshirje të terapisë për ndryshimin e gjinisë tek të miturit. Ai akuzoi kryeministrin Edi Rama dhe ministren e Shëndetësisë se po ndërmarrin një hap që, sipas tij, është “kriminal” dhe “një atentat ndaj identitetit njerëzor”.
“Çdo veprim para moshës së përgjegjësisë është një atentat në identitetin njerëzor. Mosha më ideale është 18 deri në 22 vjeç. Të përdorësh terapi për ndryshimin e gjinisë tek 14-vjeçarët është një akt i shëmtuar dhe antiligjor”, deklaroi Berisha, duke shprehur solidaritet me protestën e Koalicionit për Familjen.
I pyetur për hetimin e SPAK lidhur me tjetërsimin e dyshuar të pronave në Zvërnec, Berisha tha se mbështet çdo hetim të Prokurorisë së Posaçme, por shtoi se përgjegjësia kryesore bie mbi shtetin. Sipas tij, qeveria duhet të respektojë detyrimet që burojnë nga dokumentet dhe lejet që vetë ka lëshuar për investitorët, ndërsa pretendimet për pronësinë duhet të trajtohen sipas ligjit.
